မြန်မာနိုင်ငံ၏ဒီမိုကရေစီလမ်းကြောင်းကို အမေရိကန်ပြည်ထောင်စုနှင့်နိုင်ငံတကာမိတ်ဖက်များက ထောက်ခံအားပေး

လူအုပ်ကြီးနောက်ခံ၌ လူတစ်ဦးလက်သုံးချောင်ထောင်အလေးပြုနေပုံ
ဖေဖော်ဝါရီ ၂၁ ရက်က မြန်မာနိုင်ငံ ရန်ကုန်မြို့ ဒီမိုကရေစီအရေးဆန္ဒပြစဉ်အတွင်း ဆန္ဒပြသူတစ်ဦးက လက်သုံးချောင်းထောင်အလေးပြု ပုံလုပ်ပြနေစဉ် (ဓာတ်ပုံ - အေပီ)

ဇူလိုင် ၁၃ ၂၀၂၁

ဒီမိုကရေစီအရေးအတွက် မြန်မာပြည်သူတွေဆန္ဒပြတောင်းဆိုနေတာမှုကို အမေရိကန်ပြည်ထောင်စုနဲ့ နိုင်ငံတကာ မိတ်ဖက်နိုင်ငံတွေကနေပြီး ထောက်ခံအားပေးပြီး ငြိမ်းချမ်းစွာ ဆန္ဒပြသူတွေအပေါ် စစ်တပ်ရဲ့ အကြမ်းဖက်မှုတွေ အဆုံးသတ်ရေးအတွက် တောင်းဆိုနေကြပါတယ်။

ဖေဖော်ဝါရီ ၁ ရက် အာဏာသိမ်းချိန်ကစပြီး မြန်မာစစ်တပ်ဟာ ကလေးငယ်အများအပြား အပါအဝင် လူပေါင်း ၈၉၀ ကျော်ကို သတ်ဖြတ်ခဲ့ပြီး ဖြစ်သလို လူဦးရေ ၅၀၀၀ ကျော်ကိုလည်း ထိန်းသိမ်းထားပြီး ဒီမိုကရေစီရရှိရေး တောင်းဆိုမှုတွေအပေါ် အကြမ်းဖက် ဖြိုခွင်းမှုများကို လုပ်ဆောင်လာနေခဲ့တာပါ။

“အာဏာသိမ်းတာကို ဆန့်ကျင်သူတွေအပေါ် ခြိမ်းခြောက်တာနဲ့ ဖိနှိပ်တာကို မိမိတို့ ရှုတ်ချပါတယ်” “ဆန္ဒပြသူတွေ၊ ဆရာဝန်တွေ၊ အရပ်ဘက်လူမှုအဖွဲ့အစည်းနဲ့သတင်းထောက်တွေအပေါ် စနစ်တကျ ပစ်မှတ်ထားနေတာရပ်ကိုရပ်တန့်ရပါမယ်” လို့ ဖေဖော်ဝါရီ ၂၃ ရက် ပူးတွဲကြေညာချက် မှာ ဂျီဆဲဗင်း ထိပ်သီးခုနစ်နိုင်ငံအဖွဲ နိုင်ငံခြားရေးဝန်ကြီးတွေက ပြောဆိုထားပါတယ်။

ဂျီဆဲဗင်း ထိပ်သီးနိုင်ငံတွေကတော့ အမေရိကန်ပြည်ထောင်စု၊ ကနေဒါ၊ ပြင်သစ်၊ ဂျာမဏီ၊ အီတလီ၊ ဂျပန်နဲ့ ယူနိုက်တက်ကင်းဒမ်း တို့ဖြစ်ပါတယ်။ အဲဒီ ထုတ်ပြန်ကြေညာချက်မှာ ဥရောပသမဂ္ဂ ကိုယ်စားလှယ်လည်း ပါဝင်ခဲ့တာပါ။

အာဏာသိမ်းမှုနဲ့ ငြိမ်းချမ်းစွာ ဆန္ဒပြသူတွေအပေါ် တိုက်ခိုက်မှုအတွက် တာဝန်ရှိတဲ့ မြန်မာစစ်တပ်က တာဝန်ရှိသူတွေကို အမေရိကန် ပြည်ထောင်စုနဲ့ မိတ်ဖက်နိုင်ငံတွေ ဒဏ်ခတ်ပိတ်ဆို့ အရေးယူခဲ့ပြီး စစ်တပ်ကို ပံ့ပိုးပေးနေတဲ့ မြန်မာကုမ္ပဏီတွေကိုလည်း အရေးယူဆောင်ရွက်မှုတွေ ပြုလုပ်ခဲ့ပါတယ်။

“ဒီအာဏာသိမ်းမှုကို ပယ်ချဖို့ မြန်မာပြည်သူတွေရဲ့ အားထုတ်ကြိုးပမ်းမှုတွေကို ကျွန်တော်တို့ ဆက်ပြီး ကူညီပံ့ပိုးပေးသွားပါမယ်။ အကြမ်းဖက်မှုတွေ ရပ်တန့်ဖို့၊ တရားမဝင် ထိန်းသိမ်းထားသူအားလုံးကို ပြန်လွှတ်ပေးဖို့နဲ့ မြန်မာနိုင်ငံ ဒီမိုကရေစီလမ်းကြောင်းပေါ် ပြန်လည်ရောက်ရှိရေးအတွက် ဆောင်ရွက်ဖို့ စစ်အာဏာရှင်ကို ကျွန်တော်တို့တောင်းဆိုပါတယ်” လို့ မြန်မာနိုင်ငံ နိုင်ငံပိုင် လုပ်ငန်းနှစ်ခုအပေါ် ဧပြီ ၂၁ ရက်က ဒဏ်ခတ်ပိတ်ဆို့အရေးယူတဲ့ကြေညာချက်မှာ နိုင်ငံခြားရေးဝန်ကြီး အန်တိုနီဘလင်ကင်က ပြောကြားထားခဲ့ပါတယ်။

ဒီဆောင်းပါးဟာ မြန်မာစစ်တပ်ရဲ့လူ့အခွင့်အရေး ချိုးဖောက်မှုတွေကို ကာကွယ်တားဆီးဖို့နဲ့ အဟန့်အတားဖြစ်စေဖို့အတွက် အမေရိကန်ပြည်ထောင်စုရဲ့ ကြိုးပမ်းအားထုတ်မှုတွေနဲ့ပတ်သက်ပြီး အခါအားလျော်စွာ နောက်ဆုံးအခြေအနေတွေ တင်ပြပေးနေတာကို ပံ့ပိုးပေးထားတာပါ။

ဇူလိုင် ၁၃

မြန်မာစစ်တပ်က ဒီမိုကရေစီကိုဖျက်လိုဖျက်ဆီးလုပ်နေမှုနဲ့ မြန်မာပြည်သူလူထုအပေါ် အကြမ်းဖက်နေမှုကိုတုံ့ပြန်တဲ့အနေနဲ့ အမေရိကန်ပြည်ထောင်စုနဲ့ မိတ်ဖက်နိုင်ငံတွေကနေပြီး မကြာသေးခင်ကပဲ ဒဏ်ခတ်ပိတ်ဆို့အရေးယူမှုအသစ်တွေ ထပ်မံချမှတ်ခဲ့ပါတယ်။

“စစ်တပ်အနေနဲ့အခုသွားနေတဲ့လမ်းကြောင်းကိုနောက်ပြန်မလှည့်မချင်း၊ ဒီမိုကရေစီပြန်လည်ရရှိရေးအတွက်မပံ့ပိုးပေးမချင်း စစ်တပ်နဲ့စစ်တပ်ခေါင်းဆောင်တွေ အထိနာစေမယ့် နောက်ထပ်‌အရေးယူမှုတွေဆက်လုပ်သွားမှာပါ” လို့ ဇူလိုင်လ ၂ ရက်က မြန်မာအရာရှိ ၂၂ ဦးနဲ့ စစ်အာဏာရှင်တွေကိုအထောက်အကူပြုနေတဲ့ သတ္တုတွင်းကုမ္ပဏီတွေ၊ နည်းပညာကုမ္ပဏီတွေ ဒဏ်ခတ်ပိတ်ဆို့အရေးယူကြောင်းကြေညာစဉ်မှာ ဘလင်ကင်ကပြောကြားခဲ့ပါတယ်။

တားမြစ်ကန့်သတ်မှုတွေက ဒဏ်ခတ်ပိတ်ဆို့အရေးယူခံထားရတဲ့ အဖွဲ့အစည်းတွေကို အမေရိကန်ပြည်ထောင်စုနဲ့ စီးပွားရေးလုပ်ငန်းဆောင်ရွက်ခွင့်ကို ပိတ်ပင်တားဆီးထားပြီး စစ်အာဏာရှင်အပေါ် နိုင်ငံတကာကတညီတညွတ်တည်းချမှတ်မှုအနေနဲ့ထွက်ပေါ်လာခဲ့တာပါ။

အဝါရောင် ထီးများဖြင့် ထိုင်နေသော လူအုပ်အလယ်တွင် မတ်တတ်ရပ်နေသော လူ (ဓာတ်ပုံ - အေပီ)
မန္တလေးမြို့အပါအဝင် ဆန္ဒပြသူများက ဒီမိုကရေစီ ပြန်လည်ရရှိရေး မတ် ၁၃ ရက်တွင် တောင်းဆိုခဲ့ရာ ငြိမ်းချမ်းစွာ ဆန္ဒပြသူများကို မြန်မာစစ်တပ်က တိုက်ခိုက်ခဲ့ (ဓာတ်ပုံ – အေပီ)

ဇွန်လ ၁၈ ရက်ဆုံးဖြတ်ချက်တစ်ခုမှာလည်း ကုလသမဂ္ဂအဖွဲ့ဝင်နိုင်ငံ ၁၁၉ နိုင်ငံကနေ မြန်မာစစ်တပ်ရဲ့ အကြမ်းဖက်မှုတွေကို ကန့်ကွက်ရှုတ်ချထားပြီး အကျပ်အတည်းကိုဖြေရှင်းဖို့အတွက် ဒေသတွင်းကြိုးပမ်းအားထုတ်မှုတွေကိုလည်းအားပေးထောက်ခံထားပါတယ်။

“ရက်စက်ကြမ်းကြုတ်မှု၊ သွေးထွက်သံယိုမှုတွေနဲ့တည်ဆောက်ထားတဲ့စနစ်တစ်ခုဟာ ဘယ်တော့မှမရှင်သန်နိုင်ပါဘူး” လို့ အဲဒီဆုံးဖြတ်ချက်ကိုကြေညာစဉ်မှာ ကုလသမဂ္ဂအထွေထွေညီလာခံ ဥက္ကဋ္ဌ ဗော်လ်ကန်ဘောဇ်ကာ ကပြောကြားခဲ့ပါတယ်။

လူ့အခွင့်အရေးအကြီးအကျယ်ချိုးဖောက်မှု၊ ဒီမိုကရေစီနဲ့ တရားဥပဒေစိုးမိုးရေးကို ဖျက်လိုဖျက်ဆီးလုပ်မှုအတွက် မြန်မာစစ်တပ်အရာရှိတွေနဲ့ ကုမ္ပဏီတွေကို ဥရောပသမဂ္ဂနဲ့ ယူနိုက်တက်ကင်းဒမ်းတို့က ဒဏ်ခတ်ပိတ်ဆို့အရေးယူမှုအသစ်တွေချမှတ်တဲ့အကြောင်း ဇွန်လ ၂၁ ရက်မှာကြေညာခဲ့ပါတယ်။

“မြန်မာစစ်အာဏာရှင်နဲ့ ဆက်စပ်နေတဲ့ ကုမ္ပဏီတွေကို ကျွန်တော်တို့ရဲ့ မဟာမိတ်နိုင်ငံတွေနဲ့အတူ ဒဏ်ခတ်ပိတ်ဆို့အရေးယူမှုတွေချမှတ်ဆောင်ရွက်သွားမှာဖြစ်ပြီး တရားမ၀င်အစိုးရရဲ့ ဘဏ္ဍာရေးလုပ်ငန်းတွေကိုလည်း ပစ်မှတ်ထားလုပ်ဆောင်သွားမှာ ဖြစ်ပါတယ်” လို့ ယူကေနိုင်ငံခြားရေး၀န်ကြီး ဒေါမနစ်ရဲဘ်က ပြောကြားခဲ့ပါတယ်။

မေ ၂၆

စစ်တပ်ကနေပြီး အရပ်သားပြည်သူတွေအပေါ် အကြမ်းဖက်မှုတွေနဲ့ မြန်မာနိုင်ငံမှာ ဒီမိုကရေစီ ပြန်လည်ဖော်ဆောင်ရေးအတွက် ငြင်းဆန်နေမှုကို တုံ့ပြန်တဲ့အနေနဲ့ အမေရိကန်ပြည်ထောင်စု၊ ယူနိုက်တက်ကင်းဒမ်းနဲ့ ကနေဒါနိုင်ငံတို့ကနေပြီး မြန်မာစစ်အာဏာရှင်အပေါ် အရေးယူဆောင်ရွက်မှုတွေ ပြုလုပ်လျက် ရှိပါတယ်။

မေ ၁၇ ရက်မှာ လူပုဂ္ဂိုလ် ၁၆ ဦးနဲ့ စစ်အာဏာရှင်ရဲ့ စီမံအုပ်ချုပ်ရေးအဖွဲ့ဖြစ်တဲ့ နိုင်ငံတော်စီမံအုပ်ချုပ်ရေးကောင်စီကို အမေရိကန်ပြည်ထောင်စုကနေပြီး ဒဏ်ခတ်ပိတ်ဆို့မှုစာရင်းမှာ ထည့်သွင်းအရေးယူခဲ့ပါတယ်။ အဲဒီ အရေးယူခံရသူတွေထဲက ၁၃ ဦးဟာ စစ်အစိုးရရဲ့ အဓိက အဖွဲ့ဝင်တွေ ဖြစ်ကြပြီး သုံးဦးကတော့ ယခင်ကတည်းက အရေးယူခခံထားရတဲ့ အစိုးရအရှိတွေနဲ့ ဆက်နွှယ်သူတွေပါ။

“သမ္မတဘိုင်ဒင်ပြောခဲ့သလိုပါပဲ၊ အမေရိကန်ပြည်ထောင်စုဟာ အာဏာသိမ်းမှုအတွက် တာဝန်ရှိသူတွေကို တာဝန်ခံရစေရေးအတွက် ဆက်လက်တိုးမြှင့်လုပ်ဆောင်သွားမှာဖြစ်ပါတယ်” “ဒီနေ့ ကျွန်တော်တို့ရဲ့ဒဏ်ခတ်ပိတ်ဆို့ အရေးယူမှုဟာ စစ်အာဏာရှင်အနေနဲ့ အကြမ်းဖက်မှုတွေ မရပ်တန့်မချင်း၊ ပြည်သူလူထုရဲ့ဆန္ဒကို လေးစားတဲ့အနေနဲ့ အဓိပ္ပာယ်ပြည့်ဝတဲ့လုပ်ရပ်တွေကို မဖော်ဆောင်မချင်း နိုင်ငံရေးနဲ့ဘဏ္ဍာရေးအရ စစ်အာဏာရှင်ကို ဖိအားပေးတာဖြစ်ကြောင်း ကျွန်တော်တို့ရဲ့သန္နိဋ္ဌာန်၊ ကျွန်တော်တို့မိတ်ဖက်တွေရဲ့သန္နိဋ္ဌာန်ကို မီးမောင်းထိုးပြခြင်းဖြစ်ပါတယ်” လို့ မေ ၁၇ ရက်မှာ ဘလင်ကင်က ပြောခဲ့ပါတယ်။

အမေရိကန်ပြည်ထောင်စုရဲ့ ဒဏ်ခတ်ပိတ်ဆို့အရေးယူမှုအသစ်တွေဟာ အနည်းဆုံး အရပ်သား ငါးဦးကို သေဆုံးစေခဲ့တဲ့ လက်နက်အပြည့်အစုံတပ်ဆင်ထားတဲ့ရဟတ်ယာဉ်တွေ၊ အမြောက်တွေအသုံးပြုပြီး မြန်မာနိုင်ငံ အနောက်ပိုင်းက မင်းတပ်မြို့ကို စစ်အစိုးရက တိုက်ခိုက်ပြီးနောက်ပိုင်း ပြုလုပ်ခဲ့တာ ဖြစ်တဲ့အကြောင်း လွတ်လပ်တဲ့အာရှအသံကပြော ပါတယ်။

မေ ၂၄

မြန်မာစစ်တပ်ဟာ သူရဲ့အာဏာကို ဆုပ်ကိုင်ထားဖို့ မြန်မာပြည်သူတွေရဲ့ သတင်းအချက်အလက် ရပိုင်ခွင့်ကို ချိုးဖောက်ပြီး နိုင်ငံရဲ့စီးပွားရေးကို အကြီးအကျယ်ထိခိုက်ပျက်စီးစေတဲ့ အင်တာနက်ဖြတ်တောက်မှုကိုအကြိမ်အကြိမ် ပြုလုပ်ခဲ့ပါတယ်။

သတင်းအချက်အလက် ရရှိသုံးစွဲခွင့်ဟာ အပြည်ပြည်ဆိုင်ရာ လူ့အခွင့်အရေး ကြေညာစာတမ်းမှာ အလေးအနက်ထား ထည့်သွင်းထားတဲ့ အခြေခံကျသောလူအခွင့်အရေးတစ်ရပ်ဖြစ်ပါတယ်။ အင်တာနက် ပိတ်ဆို့ခြင်းကြောင့် အွန်လိုင်း စီးပွားရေးလုပ်ငန်းတွေကို ရပ်နားထားရခြင်းကနေ ပြည်သူ့ကျန်းမာရေးနဲ့ စားရေရိက္ခာ ထောက်ပံ့ပို့ဆောင်ရေးကို အန္တရာယ်ဖြစ်စေတဲ့အထိ ဆုံးရှုံးနစ်နာမှုများစွာ ဖြစ်စေပါတယ်။

#မြန်မာနိုင်ငံ၏စစ်တပ်နှင့် ရဲသည် ငြိမ်းချမ်းစွာ စုဝေးခွင့်ကို အပြည့်အဝ လေးစားရမည်ဖြစ်ပြီး ဆန္ဒပြသူများအနေဖြင့် လက်တုံ့ပြန်ခံရမှုများ မရှိစေရပါ။ လွတ်လပ်စွာ ထုတ်ဖော်ပြောဆိုခွင့်နှင့် သတင်းအချက်အလက်များ ရရှိပိုင်ခွင့်ကို သေချာစေရန် အင်တာနက်နှင့် ဆက်သွယ်ရေး ဝန်ဆောင်မှုများကို အပြည့်အဝ ပြန်လည်ပေးရမည်။
ဖေဖော်ဝါရီ ၆၊ ၂၀၂၁ ညနေ ၄:၄၂

ဧပြီ ၇

ဖမ်းဆီးအကျဉ်းချခံထားရသော သတင်းထောက်တွေ အပါအဝင် တရားမဝင် ဖမ်းဆီးထိန်းသိမ်းခံထားရသူအားလုံးကို ပြန်လွှတ်ပေး ဖို့နဲ့ မြန်မာပြည်သူတွေအပေါ် တိုက်ခိုက်နေမှုတွေကို အဆုံးသတ်ဖို့ မြန်မာစစ်တပ်ကို တောင်းဆိုတဲ့ ဧပြီ ၁ ရက် ထုတ်ပြန် ကြေညာချက်မှာ အမေရိကန် ပြည်ထောင်စုကလည်း နိုင်ငံပေါင်း ၇၅ နိုင်ငံ၊ ဥရောပသမဂ္ဂတို့နဲ့အတူ ပါဝင်ခဲ့ပါတယ်။

“မြန်မာနိုင်ငံမှာ အကြမ်းဖက်မှုတွေ အရှိန်မြှင့်တင်လာတာ၊ ဆန္ဒပြသူတွေကို သတ်ဖြတ်တာ၊ သတင်းထောက်တွေနဲ့ မီဒီယာသမားတွေ အပါအဝင် တရားမဲ့ ဖမ်းဆီးတာတွေနဲ့ အကြမ်းဖက်မှုတွေက ကျွန်တော်တို့ကို စိုးရိမ်စိတ်ပျက်စေပါတယ်” “တရားမဝင် ထိန်းသိမ်းထားသူတွေအားလုံးကို ချက်ချင်း ပြန်လွှတ်ပေးဖို့ ကျွန်တော်တို့ အတူတကွ တောင်းဆိုပါတယ်” လို့ သတင်းထောက်များ အကာအကွယ်ပေးရေးအတွက် ကုလသမဂ္ဂ မိတ်ဆွေများအဖွဲ့က ပူးတွဲကြေညာချက်မှာ ထည့်သွင်းပြောကြားခဲ့ပါတယ်။

အခြားလူများက ကူညီပံ့ပိုးပေးစဉ် ငိုနေသော အမျိုးသမီး (ဓာတ်ပုံ - အေပီ)
ဖေဖော်ဝါရီ ၂၃ ရက်တွင် မန္တလေးရှိ ခင်ပွန်းဖြစ်သူ၏ ဈာပန၌ အသုဘပို့ လိုက်သူများက သီတာနှင်းကို နှစ်သိမ့်ပေးနေစဉ်။ ဖေဖော်ဝါရီ ၂၀ ရက် အာဏာသိမ်း ဆန့်ကျင်ဆန္ဒပြမှုအတွင်း သက်နိုင်ဝင်းကို မြန်မာတပ်ဖွဲ့အင်အားစုများက ပစ်သတ်ခဲ့သည်။ (ဓာတ်ပုံ – အေပီ)

ဧပြီ ၁

မြန်မာစစ်တပ်ကို ပံ့ပိုးပေးနေတဲ့ စီးပွားရေးလုပ်ငန်းဆက်ဆံမှုတွေကို ပြန်လည်သုံးသပ်ဖို့အတွက် နိုင်ငံတကာကုမ္ပဏီများကို ဘလင်ကင်က မတ် ၃၀ မှာ တိုက်တွန်းဆော်ဩခဲ့ပါတယ်။ ဒီမိုကရေစီရရှိရေး တောင်းဆိုမှုတွေကို လျစ်လျူရှုတဲ့အတွက် စစ်တပ်ကို ပံ့ပိုးပေးနေတဲ့ မြန်မာကုမ္ပဏီတွေနဲ့ ဆက်ဆံမှုကို ဂျပန် အဖျော်ယမကာ ကုမ္ပဏီ Kirin နဲ့ တောင်ကိုရီးယား စတီးလ်ထုတ်လုပ်တဲ့ ကုမ္ပဏီ POSCO Coated & Color Steel ကုမ္ပဏီတွေက ဖြတ်တောက်ခဲ့ပါတယ်။

အာဏာသိမ်းမှုနဲ့ ငြိမ်းချမ်းစွာဆန္ဒပြသူတွေကို တိုက်ခိုက်မှုအတွက်တာဝန်ရှိတဲ့ မြန်မာစစ်တပ် တာဝန်ရှိသူတွေကို အမေရိကန်ပြည်ထောင်စုနဲ့ နိုင်ငံတကာ မိတ်ဖက်နိုင်ငံတွေက ဒဏ်ခတ်ပိတ်ဆို့အရေးယူခဲ့ ပါတယ်။ လူစုလူဝေးအတွင်းကို ပစ်ခတ်တာတွေ၊ ငြိမ်းချမ်းစွာ ဆန္ဒပြနေသူတွေကို အခြားနည်းလမ်းတွေနဲ့တိုက်ခိုက်တာတွေအတွက် တာဝန်ရှိတဲ့ တာဝန်ရှိသူတွေနဲ့ စစ်တပ်တပ်ရင်းတွေကို အမေရိကန်ပြည်ထောင်စုက မတ် ၂၅ မှာ ဒဏ်ခတ်ပိတ်ဆို့အရေးယူခဲ့ပါတယ်။

မတ် ၂၂ မှာ ဥရောပသမဂ္ဂကကနေပြီး အမေရိကန်ပြည်ထောင်စုက ဒဏ်ခတ်ပိတ်ဆို့အရေးယူပြီးဖြစ်တဲ့ အရာရှိအချို့ အပါအဝင် အာဏာသိမ်းခြင်းနဲ့ နောက်ပိုင်း အကြမ်းဖက်မှုတွေနဲ့ ဆက်နွှယ်တဲ့ လူပုဂ္ဂိုလ် ၁၁ ဦးကို ဒဏ်ခတ်ပိတ်ဆို့မှု စာရင်းတွင် ထည့်သွင်းအရေးယူခဲ့ပါတယ်။

လက်နက်မဲ့ ပြည်သူတွေအပေါ် မြန်မာစစ်တပ်ကသေစေလောက်တဲ့ အင်အားအသုံးပြုမှုကို ဩစတြေးလျ၊ ကနေဒါ၊ ဂျာမဏီ၊ အီတလီ၊ ဂျပန်၊ တောင်ကိုရီးယားနဲ့ အမေရိကန်ပြည်ထောင်စု အပါအဝင် ဒါဇင်နဲ့ချီတဲ့နိုင်ငံက ကာကွယ်ရေးဦးစီးချုပ်တွေက ရှုတ်ချကြောင်း မတ်၂၇ရက်ပူးတွဲကြေညာချက် မှာထည့်သွင်းပြောကြားခဲ့ပါတယ်။

“အရည်အချင်းပြည့်ဝတဲ့ တပ်မတော်တစ်ရပ်ဟာ အပြည်ပြည်ဆိုင်ရာကျင့်၀တ်စံနှုန်းတွေကို လိုက်နာပြီး ၎င်းတို့အလုပ်အကျွေးပြုရတဲ့ ပြည်သူလူထုအပေါ် အန္တရာယ်ပြုဖို့မဟုတ်ဘဲ ကာကွယ်စောင့်ရှောက်ရမယ့် တာဝန်ရှိတယ်” လို့ ဦးစီးချုပ်တွေကပြောကြားခဲ့တာပါ။