انگلینڈ کے بادشاہِ وقت یا ملکہِ وقت سے ‘نائٹ’ کا خطاب پانے کے لیے برطانوی شہری ہونا یا اشرافیہ سے تعلق رکھنا ضروری نہیں ہوتا۔
برطانوی حکومت اور شاہی سفارشات کی بنا پر کئی درجن امریکی شہری بھی برطانیہ اور دنیا کے لیے قابل قدر خدمات کے اعتراف میں (مرد) اعزازی نائٹ اور (خواتین) ڈیمز [dames] کا اعزاز پا چکی ہیں۔
اگرچہ برطانوی حکومت اور تاج برطانیہ اس اعزاز کے لیے عموماً امریکہ کے اعلیٰ سطح کے سول اور فوجی افسروں کا انتخاب کرتے ہیں تاہم آرٹس، سائنسی علوم، فلاحِ عامہ کے کاموں اور انسانی خدمات کے شعبے میں اپنی اپنی خدمات کے باعث دیگر لوگ بھی اعزازی طور پر “نائٹ ہُڈ” کا خطاب حاصل کر چکے ہیں۔
یہ اعزاز پانے والے برطانویوں کے برعکس غیربرطانویوں کو اپنے نام کے ساتھ ‘سر’ یا ‘لیڈی’ استعمال کرنے کی اجازت نہیں ہوتی۔ تاہم انہیں اپنے نام کے ساتھ وہ حروف لکھنے کا حق حاصل ہوتا ہے جن سے انہیں عطا کیے جانے والے خصوصی درجے کی نشاندہی ہوتی ہے۔
مثال کے طور پر 2001 میں ملکہ الزبتھ دوئم نے امریکی ایونجلسٹ مبلغ بلی گراہم کو مذہبی زندگی کے حوالے سے دنیا بھر میں ان کی خدمات پر ‘آنریری نائٹ کمانڈر آف دی آرڈر آف دی برٹش ایمپائر’کا خطاب دیا جس کے بعد وہ اپنے نام کے ساتھ ‘کے بی ای’ لکھنے کے مستحق ٹھہرے۔
1943 میں جب امریکی فوجی جنرل، ڈوائٹ ڈی آئزن ہاور جرمن فوجوں کے خلاف اتحادی جنگ میں برسرپیکار تھے تو انہیں ‘موسٹ آنریبل آرڈر آف دی باتھ، نائٹ گرینڈ کراس’ کا اعزاز ملا۔ یہ اعزاز 1725ء میں شاہ جارج اول نے فوجی خدمات یا مثالی سویلین کارناموں کے اعتراف میں جاری کیا تھا۔ چند سال بعد آئزن ہاور نے ایک اضافی ‘برٹش آرڈر آف میرٹ’ بھی حاصل کیا۔ وہ 1953 میں امریکہ کے صدر بنے۔
صدر رونلڈ ریگن اور جارج ایچ ڈبلیو بش دونوں نے اپنی صدارتی مدتیں ختم ہونے کے فوری بعد برطانوی امور خارجہ کی معاونت کے صلے میں ‘موسٹ آنریبل آرڈر آف دی باتھ، نائٹ گرینڈ کراس’ کے اعزازات حاصل کیے۔
ملکہ الزبتھ دوئم نے امریکی اداکارہ اور اقوام متحدہ کی خصوصی ایلچی انجلینا جولی کو جنگ زدہ علاقوں میں جنسی زیادتیوں کے خلاف مہم چلانے کے اعتراف میں 2014 میں اعزازی ڈیم [dame] کا خطاب عطا کیا تھا۔ ایک نجی تقریب میں ملکہ نے جولی کو ممتاز ترین ‘آرڈر آف سینٹ مائیکل اینڈ سینٹ جارج’ کے’ اعزازی ڈیم گرینڈ کراس’ کا نشان پیش کیا۔ یہ اعزاز ان لوگوں کے لیے مخصوص ہے جو بیرون ملک اہم نوعیت کی غیر فوجی یا خارجہ امور کے شعبے میں نمایاں خدمات انجام سر انجام دیتے ہیں۔
