زمین پر ہر قسم کی زندگی کا دارومدار سمندر پر ہے۔ سمندر ہماری آب و ہوا میں باقاعدگی پیدا کرنے کے ساتھ ساتھ اربوں لوگوں کو خوراک بھی فراہم کرتا ہے۔
امریکہ بحرالکاہل کے ملک پالاؤ کے ساتھ مل کر 13 اور 14 اپریل 2022 کو ایک کانفرنس کی مشترکہ میزبانی کر رہا ہے۔ کانفرنس کا عنوان ہے: ‘ہمارے سمندر کی کانفرنس’۔ پالاؤ بحرالکاہل میں واقع 200 سے زائد آتش فشانوں اور مونگوں پر مشتمل جزائر والا ایک ملک ہے اور یہ اس کانفرنس کی میزبانی کرنے والا چھوٹے جزائروالا پہلا ترقی پذیر ملک ہے۔
نجی اور سرکاری شعبوں کے رہنما سمندر کی حفاظت اور پلاسٹک کی آلودگی اور غیر قانونی ماہی گیری جیسے مسائل سے نمٹنے کے لیے اقدامات کرنے کے عہد کریں گے۔
امریکی حکومت کے متعدد نمائندے سمندر کی پائیداری کی اہمیت کے بارے میں بات کر چکے ہیں۔
“[کرہ ارض پر آکسیجن] کا اکیاون فیصد حصہ سمندر سے آتا ہے اور اس کے باوجود ہم انسان اس وقت سمندر کی کیمیائی ساخت جتنی تیزی سے تبدیل کر رہے ہیں اتنی لاکھوں سالوں میں تبدیل نہیں کی گئی۔” آب و ہوا کے لیے صدر کے خصوصی ایلچی جان کیری
“ایک اندازہ لگایا گیا ہے کہ ہم ہر سال آٹھ سے چودہ ملین ٹن پلاسٹک کی آلودگی سمندر میں پھینکتے ہیں۔ اس طرح ہر ایک دن کے ہر ایک منٹ میں تقریباً پلاسٹک سے بھرا ایک ٹرک سمندر میں پھینکا جاتا ہے اور اس شرح میں اضافہ ہو رہا ہے، کمی نہیں ہو رہی۔” – وزیر خارجہ اینٹونی بلنکن
“دنیا کے سمندری طاس ہماری قوم کی کامیابی اور زمین پر زندگی کے لیے بلا شک و شبہ بہت اہم ہیں۔ سمندر ہماری معیشت کو قوت فراہم کرتا ہے، اربوں لوگوں کے لیے خوراک مہیا کرتا ہے … اور موسم کے ردوبدل اور ہمارے عالمی آب و ہوا کے نظام میں باقاعدگی پیدا کرتا ہے۔” – صدر جوزف آر بائیڈن
“ہمیں اس بات کا خیال رکھنا ہے کہ سمندر میں کیا ہے، سمندر کے پانی کے اوپر کیا ہے، ہم سمندر میں کیا ڈال رہے ہیں، اور ہم سمندر سے کیا نکال رہے ہیں۔” – آب و ہوا کے لیے صدر کے خصوصی ایلچی جان کیری
