30 اگست کو روس کے یوکرین پر بلااشتعال حملے کے بعد بحیرہ اسود میں یوکرین کے اناج کی ترسیل کے لیے پہلی کھیپ افریقہ پہنچی۔ اس سے قرن افریقہ کے خطے میں لوگوں کو خوراک فراہم کرنے میں مدد ملے گی۔
ایک اندازے کے مطابق 23,000 میٹرک ٹن یوکرینی گندم امریکہ کی حکومت کی مدد سے اقوام متحدہ کے خوراک کے عالمی پروگرام (ڈبلیو ایف پی) کے ذریعے پہنچائی جا چکی ہے۔ گندم کی اس مقدار سے 60 ملین سے زیادہ روٹیاں بنائی جا سکتی ہیں۔
یہ گندم قرنِ افریقہ کی اُن کمیونٹیوں میں تقسیم کی جائے گی جو لگاتار چار خشک سالیوں کا شکار ہوچکی ہیں۔ اِن متواتر خشک سالیوں سے اس خطے کے لوگوں کو شدید بھوک کا سامنا ہے۔
امریکہ کے وزیر خارجہ اینٹونی بلنکن نے ایک بیان میں کہا کہ “یوکرین کی زرعی اجناس کی پیداوار خوراک کی عالمگیر سلامتی کے لیے انتہائی اہم ہے۔”
بلنکن نے کہا کہ فروری کے بعد سے امریکہ عالمی سطح پر خوراک کے تحفظ کے لیے 5.4 ارب ڈالر سے زیادہ کی انسانی امداد فراہم کر چکا ہے۔ اس کا مقصد خوراک کے حوالے سے غیر محفوظ ممالک میں ہنگامی بنیادوں پر خوراک کی دستیابی کو یقینی بنانے کی کارروائیوں میں اضافہ کرنا ہے۔
اقوام متحدہ کے خوراک کے عالمی پروگرام کے ذریعے پہنچائی جانے والی امداد
امریکہ کے بین الاقوامی ترقیاتی ادارے (یو ایس ایڈ) نے 16 اگست کو اعلان کیا کہ وہ خوراک کے عالمی بحران سے نمٹنے میں مدد کی خاطر ڈبلیو ایف پی کو 68 ملین ڈالر کے اضافی امریکی فنڈ فراہم کرے گا۔
جب اس گندم کی خرید کا اعلان کیا گیا تو یو ایس ایڈ کی منتظمہ سمنتھا پاور نے کہا کہ “یہ امداد انتہائی اہم ہے۔ روس کے مکمل حملے سے قبل یوکرین ڈبلیو ایف پی کو سب سے زیادہ گندم فراہم کرنے والا اور تجارتی طور پر گندم برآمد کرنے والا دنیا کا چوتھا بڑا ملک تھا۔”
ڈبلیو ایف پی کے ایگزیکٹو ڈائریکٹر، ڈیوڈ بیسلی نے 16 اگست کو کہا کہ “دنیا میں بھوک کے شکار لوگوں کی مدد کرنے کے لیے کوئی ایک اہم ترین کام جو ہم اس وقت کر سکتے ہیں وہ بحر اسود کی بندرگاہوں کو کھولنا ہے۔”
خوراک کی فوری فراہمی بہت ضروری ہے۔ ڈبلیو ایف پی سال 2022 کو بھوک کے حوالے سے ایک ایسا سال قرار دے رہی ہے جس کی کوئی مثال نہیں ملتی۔ اس ادارے کا کہنا ہے کہ:-
- 828 ملین افراد روزانہ بھوکے سوتے ہیں۔
- 82 ممالک میں 345 ملین افراد کو خوراک کے عدم تحفظ کا سامنا ہے۔
- 45 ممالک میں 50 ملین افراد کو قحط جیسے حالات کا سامنا ہے۔
یو ایس ایڈ نے بتایا کہ 24 فروری کے حملے کے بعد روس نے یوکرین کی بحیرہ اسود کی بندرگاہوں کی ناکہ بندی کر دی۔ اس ناکہ بندی کے نتیجے میں مہینوں تک ملک کے اندر 20 ملین ٹن سے زیادہ یوکرینی اناج پھنسا رہا اور اناج کا وہ شدید تحرین بحران بد سے بدتر ہوتا چلا گیا جو دنیا دہائیوں بعد دیکھ رہی ہے۔
امریکہ بحیرہ اسود کے ذریعے یوکرینی زرعی اجناس کی برآمدات کو دوبارہ شروع کرنے کے لیے یوکرین اور روس کے درمیان ترکی اور اقوام متحدہ کی ثالثی میں طے پانے والے معاہدے کی حمایت کرتا ہے۔ بلنکن نے کہا کہ محکمہ خارجہ “روس کی طرف سے معاہدے کی شرائط کی پابندی کیے جانے پر گہری نظر رکھے ہوئے ہے،”
انسان دوست شعبوں سے تعلق رکھنے والے عہدیداروں نے متنبہ کیا ہے کہ موسمیاتی تبدیلیوں، تصادموں اور کووڈ-19 کے باعث ترسیلی سلسلوں میں پڑنے والے رخنوں کی وجہ سے خوراک کا عالمی بحران شدت اختیار کرتا چلا جا رہا ہے۔
This week, the ship Brave Commander is delivering 23,000 metric tons of grain to Africa. This is enough grain to make 60+ million loaves of bread—and that’s just one ship coming out of Ukraine. pic.twitter.com/MRpN90mYVe
— Department of State (@StateDept) September 1, 2022
یوکرین کا زرعی شعبہ یوکرین کی مجموعی قومی پیداوار کا تقریباً 11% اور افرادی قوت کا 20% ہے۔ گو کہ اب بحری جہاز یوکرین کی بندرگاہوں سے اناج لے کر روانہ ہو رہے ہیں مگر کریملن کی وحشیانہ جنگ کے براہ راست نتیجے میں یوکرین کے زرعی شعبے کو اب بھی سنگین خطرات کا سامنا کرنا پڑ سکتا ہے۔
یوکرین کی زرعی اجناس کی برآمدات کو تقویت پہنچانے اور غذائی تحفظ کے عالمگیر بحران کو کم کرنے میں مدد کرنے کی خاطر جولائی میں یو ایس ایڈ نے 100 ملین ڈالر مالیت کے ایک منصوبے کا آغاز کیا۔
بلنکن نے روس سے یوکرین میں جنگ ختم کرنے کے اپنے مطالبے پر دوبارہ زور دیا۔ انہوں نے کہا کہ جنگ کا خاتمہ عالمگیر غذائی عدم تحفظ میں ہونے والے حالیہ اضافے سے نمٹنے میں بہت مدد کرے گا۔”
