اس سال وائٹ ہاؤس میں کرسمس کی سجاوٹوں میں رنگ برنگی چمکدار جھنڈیاں، فاختاؤں کی شکل میں سجاوٹی اشیاء، خاندانی تصاویر اور چمکیلے ڈبوں میں بند تحائف شامل ہیں۔ ایک سو رضاکاروں نے پھولوں کی 25 مخصوص چادریں، 41 کرسمس ٹری، 300 موم بتیاں، 6,000 فٹ ربن، 10,000 زیورات اور تقریباً 80,000 رنگ برنگی روشنیوں کا استعمال کرتے ہوئے اِس تہوار کے موقع پر وائٹ ہاؤس کو سجایا۔
بائیڈن گھرانے کی وائٹ ہاؤس میں پہلی کرسمس کے موقع پر خاتون اول جِل بائیڈن نے حال ہی میں 2021 کے تہوار کے موقع پر اس عمارت کی سجاوٹوں کی نقاب کشائی کی جن کا عنوان “دِ لی تحفے” ہے اور اس کا مرکزی خیال یقین، کمیونٹی، خاندان، دوستی، علم، فطرت، شکرگزاری، خدمت، امن، اتحاد اور ایسے فنون ہیں جو تمام عمر اور پسہائے منظر کے حامل امریکیوں کو یکجا کرتے ہیں۔
وائٹ ہاؤس کا ہر ایک کمرہ کسی نہ کسی انداز میں اِس مرکزی خیال کی عکاسی کرتا ہے۔ وائٹ ہاؤس کا کہنا ہے کہ مثال کے طور پر راہداری میں رنگ بدلتے قمقمے اور شہاب ثاقب کی طرح تیزی سے حرکت کرتے ہوئے ستارے “اُس امن اور روشنی کی نمائندگی کرتے ہیں جو وبائی امراض کے دوران اگلی صفوں میں کام کرنے والے اور ہنگامی حالات میں مدد کو سب سے پہلے پہنچنے والے کارکن لے کر آئے ہیں۔”
لائبریری میں رکھیں اور ری سائیکل شدہ اخباروں سے تیار کردہ آرائشی کتابوں کے ڈھیر، پرندے اور تتلیاں علم کے تحفے کی نمائندگی کرتے ہیں۔ وائٹ ہاؤس میں دن بدن بڑھتی ہوئی چینی کے بنے ہوئے برتنوں کی تعداد کو نمائش کے لیے رکھنے کی خاطر 1917 میں خاتون اول، ایڈتھ ولسن کی طرف سے چائنا روم قرار دیئے جانے والے کمرے میں میں ڈنر پارٹی کا ایک میز لگایا گیا ہے جس میں دوستی کے تحفے کو اجاگر کیا گیا ہے۔ ہاتھ سے لکھے گئے شکریے کی تحریریں ایسٹ روم میں رکھی گئی ہیں جو شکر گزاری کی عکاسی کرتی ہیں۔
وائٹ ہاؤس کے بلیو روم میں رکھے کرسمس ٹری کو امن اور اتحاد کے تحائف کی نمائندگی کرنے والی فاختاؤں سے سجایا گیا ہے۔ اس بلند و بالا درخت کو لگانے کی خاطر کمرے میں لگے فانوس کو عارضی طور پر ہٹا دیا گیا ہے۔ وائٹ ہاؤس کے شیف ہر سال ادرک کے ذائقے والی روٹی سے وائٹ ہاؤس کا ماڈل تیار کرتے ہیں۔ اس برس اس ماڈل کے ساتھ گاؤں کا ایک ماڈل بھی بنایا گیا ہے جس میں سکول، پرچون کی دکان، گودام اور اسپتال کے ساتھ ساتھ پولیس سٹیشن، فائر سٹیشن اور پٹرول پمپ بھی شامل ہیں۔
بائیڈن گھرانے نے ایک بیان میں کہا، “ہم آپ کے لیے ایک خوشگوار، صحت مند اور پرلطف تہواروں کے موسم کی خواہش رکھتے ہیں۔ ایسے میں جب ہم امکانات سے بھرے نئے سال کے منتظر ہیں ہماری دعا ہے کہ ہمارے دل سے پیش کیے گئے تحفے ہماری آگے کے راستے کو روشن کریں۔”
