ایالا نوئے مئیر شمالی اسرائیل میں زیتون کے پھل سے تیل نکالنے کے ایک کارخانے کی مالکہ ہیں۔
خالد حسن حسین یٰسین الجنیدی ایک فلسطینی انجنیئر ہیں اور زیتون کے تیل کے ماہر ہیں۔
دونوں کی ملاقات امریکی حکومت کی مالی مدد سے چلائے جانے والے “سرحدوں سے ماورا زیتون کے تیل” نامی ایک پراجیکٹ کے ذریعے ہوئی۔ زیتون کے تیل کی تیاری سے متعلق تکنیکوں کے موضوع پر ہونے والی ورکشاپوں نے ان دونوں کو ایک جگہ اکٹھا کر دیا۔ اپنے پیشے سے اِن دونوں کی مشترکہ محبت نے انہیں یہ سمجھنے میں مدد دی کہ ایک دوسرے کی مہارت سے کتنا کچھ سیکھا جا سکتا ہے۔
نوئے مئیر کا کہنا ہے کہ اِن ورکشاپوں کے ذریعے اُن کی فلسطینی کاشت کاروں اور تیل پیدا کرنے والے اُن لوگوں سے ملاقاتیں ہوئیں جن سے پہلے وہ شازونادر ہی ملتی تھیں۔
دونوں نےمل کر زیتون کا پھل چننے سے پہلے، کیڑے مکوڑوں پر قابو پانے، اضافی آبپاشی اور زیتون کے تیل چکھنے کے سیمیناروں کے ذریعے معیار کو پرکھنے اور دیگر معاملات کے بارے میں سیکھا۔
2013ء میں اس پراجیکٹ کے تحت اُس سمجھوتے کی حمایت کی گئی جس کے مطابق ایک عشرے کے بعد پہلی مرتبہ اسرائیلی شہریوں کو زیتون کا فلسطینی تیل خریدنے کی اجازت دی گئی۔ اس کے نتیجے میں فلسطینی کاشت کاروں نے دو سالوں سے بھی کم عرصے میں اپنی آمدنی دو کروڑ ڈالر تک بڑھا لی۔
گزشتہ پانچ برسوں میں یو ایس ایڈ نے 2,600 سے زائد اسرائیلی اور فلسطینی کاشت کاروں کو ‘سرحدوں سے ماورا’ پراجیکٹ کے تحت اعلٰی معیار کا زیتون کا تیل پیدا کرنے میں مدد فراہم کی ہے۔ مشرقِ قریب فاؤنڈیشن کے زیرِنگرانی چلایا جانے والا یہ پراجیکٹ، کاشت کاروں، کارخانوں کے مالکان اور زیتون کے تیل کے تقسیم کنند گان کو ورکشاپوں کے ذریعے ایک جگہ اکٹھا کرتا ہے جس سے زیتون کے تیل کی پیداور اور منافع بڑہانے والی اُن کی کاشت کاری کی صلاحیتوں میں اضافہ ہوتا ہے۔
اس پروگرام کا شمار درجنوں بھر اُن پروگراموں میں ہوتا ہے جن کی یو ایس ایڈ کے ‘ تنازعات کے حل اور روک تھام کے پروگرام ‘ کے تحت مدد کی جاتی ہے۔ بہت سے موقعوں پر اِن پراجیکٹوں کی وجہ سے اسرائیلی اور فلسطینی پہلی مرتبہ آپس میں ملتے ہیں۔
الجنیدی کہتے ہیں، “دنیا بھر میں زیتون کی شاخ امن کی علامت ہے۔ اس سرزمین کے لیے میری خواہش زیتونی امن ہے۔”
اس مضمون کی ایک طویل شکل یو ایس ایڈ کی ویب سائٹ پر موجود ہے۔
