یہ مضمون قسط وار مضامین کے اُس سلسلے کا حصہ ہے جن میں بتایا گیا ہے کہ روسی حکومت اور ولاڈیمیر پوٹن نے دنیا میں شہریوں پر کیے جانے والے کیمیائی حملوں میں اپنے یا اپنے اتحادیوں کے ملوث ہونے پر کس طرح پردہ ڈالا۔ اس سلسلے کے دیگر مضامین میں روس کے سابق انٹیلی جنس افسر سرگئی سکریپال کو 2018 میں زہر دینے اور فعال سیاسی کارکن الیکسی ناوالنی کو 2020 میں زہر دینے کا جائزہ لیا گیا ہے۔
شام کی حکومت کی جانب سے 4 اپریل 2017 کو خان شیخون قصبے میں اپنے شہریوں پر کیمیائی ہتھیاروں سے حملہ کرنے کے چند دن بعد، روسی حکومت نے روسی صدر ولاڈیمیر پوٹن کے اتحادی شامی صدر بشار الاسد کے تحفظ کے لیے غلط معلومات پھیلانے کی مہم شروع کر دی۔
شام میں 2017 میں سارین گیس کے حملے میں 30 بچوں سمیت 90 افراد ہلاک ہوئے۔
اقوام متحدہ اور کیمیائی ہتھیاروں کی ممانعت کی تنظیم کی مشترکہ آزادانہ تحقیقات میں شامی حکومت کو اس حملے کا ذمہ دار پایا گیا۔
کریملن کے انکار
حملے کے فوراً بعد روسی حکومت نے شامی حکومت کے اس حملے میں کردار کی تردید کے لیے گمراہ کن معلومات کی مہم شروع کی اور اقوام متحدہ جیسے بین الاقوامی اداروں میں من گھڑت بیانیوں کو آگے بڑھایا۔
اپنے اتحادی کے تحفظ کے لیے روسی حکام اور کریملن کے زیر کنٹرول میڈیا نے گمراہ کن طور پر امریکہ سمیت شام سے باہر کے ذرائع پر اس حملے کا الزام لگایا۔
کریملن نے جھوٹے دعوے پھیلانے کے لیے اپنے ریاستی کنٹرول والے میڈیا کے ادارے اور سوشل میڈیا کا بھی استعمال کیا۔ روس کی فوج کے زیر انتظام ایک ٹیلی ویژن سٹیشن نے جھوٹا دعویٰ کیا کہ یوکرین نے حملے کے ایک ہفتے بعد 8 اور 12 اپریل 2017 کو مشرق وسطیٰ میں کیمیائی ہتھیار بھیجے اور یہ باور کرانے کی کوشش کی کہ یوکرین اِس حملے میں ملوث ہے۔
روسی حکام نے غلط معلومات پھیلانے کے لیے غلط شناختوں، بوٹس اور ٹرولز کا استعمال بھی کیا۔ اسی لیے خان شیخون کے حملوں کے بعد کے دنوں میں جھوٹے ٹوئٹر اکاؤنٹس میں اضافہ دیکھنے میں آیا۔
وزیر خارجہ سرگئی لاوروف سمیت روسی حکام نے عوامی فورموں پر بے بنیاد رپورٹوں کو دہرایا۔
12 اپریل 2017 کو روسی فیڈریشن نے اس حملے کی مذمت کرنے والی اقوام متحدہ کی سلامتی کونسل کی قرارداد کو ویٹو کر دیا۔
اس سسلسے کی مزید قسطوں کے لیے شیئر امریکہ کو دیکھتے رہیے۔
